Ипотекийн зээл авахад ямар ямар шалгууруудыг хангах ёстой вэ?

Засгийн газрын 2016 оны 137 дугаар тогтоолоор баталсан “Ипотекийн зээл, санхүүжилтийн ерөнхий журам”-ын дагуу зээл хүсч буй иргэн нь дараах шаардлагыг хангасан байх шаардлагатай. 

• Монгол Улсын иргэн, 18 нас хүрсэн, эрх зүйн бүрэн чадамжтай байх; 

• Банк, санхүүгийн байгууллагад хугацаа хэтэрсэн, чанаргүй зээлийн өрийн үлдэгдэлгүй байх 

• Шүүхийн шийдвэрийн дагуу төлөх өр, төлбөргүй байх; 

• Зээлийн хугацаа дуустал холбогдох хууль тогтоомжийн дагуу даатгалд хамрагдах; • Барьцаалбар үйлдсэн байх. Харин ипотекийн зээлийн барьцааны зүйл болох орон сууц нь дараах шаардлагыг хангасан байна: 

• Монгол Улсад байршилтай, нийтийн зориулалттай болон амины орон сууц байх; 

• Зээлийн хугацаа дуустал холбогдох хууль тогтоомжийн дагуу эд хөрөнгийн даатгалд хамрагдсан байх; 

• Ашиглалтад зохих журмын дагуу бүрэн хүлээн авсан байх; 

• Эд хөрөнгө өмчлөх болон бусад эрхийн талаар гуравдагч этгээдэд шаардах эрх үүссэн бол түүнийг хэлцлийн талууд зөвшөөрсөн байх; 

• Биет байдал, чанарын доголдолгүй байх; 

• Инженерийн дэд бүтцэд бүрэн холбогдсон, барилгын техникийн хяналт хэрэгжүүлэгч байгууллагын шийдвэрээр ашиглахыг хориглоогүй байх; 

• Амины орон сууцны хувьд газрыг өмчлөх, эзэмших эрх улсын бүртгэлд бүртгэгдсэн байх. 

Та байр авахаар хайж байна уу

Улаанбаатар хотын аль ч байрлалд өөрийн борлуулж буй байрнуудаас санал болгож байна. 

Орон сууцны ипотекийн зээл гэж юу вэ?

Орон сууцны ипотекийн зээл гэдэг нь бүрэн баригдаж дууссан, Улсын комисс хүлээж ашиглалтад хүлээж авсан, улсын бүртгэлд бүртгэгдсэн, үл хөдлөх эд хөрөнгийн гэрчилгээгээр баталгаажсан, орон сууцны зориулалттай үл хөдлөх эд хөрөнгө барьцаалсан зээлийг хэлдэг. Өөрөөр хэлбэл, тухайн орон сууцны үнийн дүнгийн багахан хэсгийг төлөөд сонгосон байрандаа та нүүж орох боломжтой юм. Үүний тулд арилжааны банкнаас тавих шаардлагуудыг хангасан байх хэрэгтэй. 

Ипотекийн зээл гэж юу вэ? Ипотек болон Моргейж гэсэн ойлголтод ялгаа байдаг уу?

Европын орнууд, Азийн хойд бүсийн орнуудад Ипотек гэсэн томьёог өргөн хэрэглэдэг байна. Харин АНУ болон өмнөд Америк, Азийн урд талын зарим оронд Моргейж гэсэн ойлголт түгээмэл байдаг аж. Энэ хоёрын аль аль нь үл хөдлөх хөрөнгийг барьцаалж, урт хугацааны зээл олгох тухай асуудал. Ипотек гэдэг нэр томьёо анх МЭӨ VI зуунд Афинд үүссэн гэдэг. Тэр үед зээлийн барьцаа нь зээлдэгч өөрөө байдаг байсан бөгөөд өрөө төлж чадахгүй бол боол болох нь энүүхэнд байдаг байсан аж. 

Чухам энэ үед Грекийн суут ухаантан Солон өрөө төлж чадахгүй хариуцлагаа биеэрээ төлдөг байсныг эд хөрөнгөөрөө төлдөг болгох зорилгоор барьцааны өөр хувилбарыг бий болгосон нь орчин үеийн Ипотекийн эхлэл болжээ. Зээл авсан хүний газрын захад шон босгож дээр нь тухайн газар нь тийм хугацаатай тийм хэмжээний зээлийн барьцаа болсон бөгөөд зээлээ төлж чадахгүй бол энэ газар зээлдүүлэгчийн өмч болно гэх зэргээр зээлдэгч зээлдүүлэгчийн нэр устай хамт бичдэг байж. Чухам энэ холбоосыг ипотек гэж нэрлэдэг байсан байна. Ийм тэмдэг тавиулсан газрын эзэн тухайн газар дээр байгаа эд хөрөнгийг зөөж авч явах эрхгүй байжээ. Гэсэн ч энэ ойлголт цаг хугацааны явцад хувьсан өөрчлөгдөж ипотек гэдэг үгээр зээлийн барьцаа болон дурын үл хөдлөх хөрөнгийг нэрлэдэг болжээ.